■ DUMBOL: Maayong pagkaguba ang atubangan nga bahin ning trak nga gikargahan og mga manok nga ihawnon human mabangga sa lubot sa usa ka bus de pasaheroan sa alas 10:45 sa buntag sa Miyerkules, Nobiyembre 22, 2023 sa Brgy. Uling, dakbayan sa Naga. Duha ang namatay, usa niini truck boy nga nasunog (wala nga hulagway).

Duha ka mga tawo ang nangamatay, usa kanila truck boy nga nasunog, human mabangga ang ilang trak ngadto sa gisundan niini nga bus nga pasaheroan alas 10:45 sa buntag sa Miyerkules, Nobiyembre 22, 2023 sa Brgy. Uling, dakbayan sa Naga.

Nisilaob ang passenger front seat human nibuto ang butane canister nga ilang gidala hinungdan sa pagkasunog og apil sa truck boy bisan kon gitabang pa siya pinaagi sa pagpasirit og fire extinguisher sa barangay personnel.

Sa mao nga insidente, 14 ang laing nangaangol, 13 ang mga pasahero sa Calvo bus samtang ang usa nagmaneho usab og motorsiklo.

Ang truck boy nga namatay giila lang sa angga nga Junior sa pagsuwat ning taho.

Ang ikaduha nga namatay giila nga si Waynares Dien Parame, 23, ulitawo, taga Lanas, dakbayan sa Naga, kinsa nagmaneho sa iyang motorsiklo dihang apil sa gidaro sa trak nga gimaneho ni Adonis Espera, taga Compostela, amihanang Sugbo.

Sila si Espera ug lain niyang truck boy nga si John Carlo Flores naa sa kritikal nga kahimtang dihang gidala sa tambalanan.

Nahitabo ang aksidente duol sa barangay hall sa Uling.

Sa interbyo sa Superbalita Cebu sa hepe sa kapulisan sa dakbayan sa Naga nga si Police Lt. Col. William Humoc, nasayran nga mga alas 10:45 sa buntag Nobiyembre 22, 2023, nahitabo ang aksidente sa provincial road sa Brgy. Uling.

Matod ni Humoc nga ang cargo truck sa JDK Trucking nga may karga’ng mga manok nga ihawnon gikan sa siyudad sa Toledo ug padung sa ihawan sa siyudad sa Naga.

Si Humoc niingon nga samtang nagdulhog ang trak, nawad-an na kini og brake.

Unang nadaro sa trak mao ang mga nagmotorsiklo nga sila si Parame ug Joseph Emmanuel Bacalla, 47, minyo, taga Poblacion, lungsod sa Tabuelan, amihanang Sugbo.

Human sa pagbangga sa duha ka mga motorsiklo, nidumbol usab kini sa bus.

Sila si Espera, Flores ug Junior nangapiit sa front seat kay napiyapi kini sa kakusog sa impact.

Nisilaob si Junior tungod sa pagbuto sa ilang dala nga butane canister nga ilang gigamit sa pagluto og pagkaon sa ilang mga biyahe.

Ang mga biktima gidali sa pagtabang sa rescue team ug gipangdala sa tambalanan, apan si Junior gipasiritan una sa fire extinguisher una pa gihulbot gikan sa sakyanan.

Gibutyag ni Humoc nga tulo na ka mga trak de karga nga gikargahan og mga manok nga bantres ang nadisgrasya sa Brgy. Uling ning Nobiyembre.

Giduaw siya sa mga personnel sa Land Transportation Office (LTO) kay naalarma na sa sunodsunod nga mga aksidente sa Brgy. Uling.

Niadto lang Lunes sa hapon, Nobiyembre 20, duha ka mga tawo ang nangaangol dihang nahaybol usab ang ilang trak nga gikargahan og mga manok bantres sa sityo Upper Gawaygaway, Brgy. Uling.

Nasangit ang trak sa poste busa wa sila malahos sa ubos.

Si Humoc niingon nga ilang pabutangan og mga pahimangno sa mga driver nga mag-amping ug maghinayhinay sa pagpadagan sa ilang mga sakyanan sa maong dapit aron malikayan ang aksidente.