■ NASUNOG: Mao kini ang usa sa mga balay nga naugdaw sa sunog sa Upper Capaculan, Brgy. Tisa, Dakbayan sa Sugbo sa Huwebes, Nobiyembre 23, 2023 sa buntag nga nipatay og upat ka mga bata, tulo kanila magsuon samtang ang usa ilang ig-agaw. Sa pikas hulagway, makita ang usa sa mga lawas sa bata nga giputos.

Nakapangayo pa og pakitabang ang tulo ka mga bata nga magsuon nga nangamatay sa sunog samtang nagsud-ong ang ilang banay ug mga silingan apan wa nay nahimo tungod sa kadako na sa kayo.

Ang mga bata diha sa bentana sa ikaduhang andana sa balay sa pamilyang Cabornay nagpaninggit og pakitabang atol sa sunog sa mga alas 5:51 sa buntag sa Huwebes sa Sitio Upper Capaculan, Brgy. Tisa, dakbayan sa Sugbo.

Wa sila nakaambak sa bentana tungod sa mga birha.

Naapil pagkasunog sa tulo ka mga magsuon ang ilang ig-agaw nga masuso nga 11 pa ka buwan.Ang panimalay nga nasunog gipanag-iya ni Gemma Cabornay.

Giisa sa first alarm sa alas 5:55 sa buntag ang sunog ug nakontrolar alas 6:11 sa buntag ug hingpit nga napawong paglabay sa upat ka minutos, apan niugdaw kini sa lima ka mga balay ug nikaon sa portion sa laing duha. Nibilin kini og danyos nga P525,000.

NANGAMATAY

Ang tulo nga nangamatay mao sila si Angelo,10; Crylle, 6, ug Christina Bayaton, usa ka tuig. Ang ilang ig-agaw nga namatay sab giila nga si Amari Zane Cabornay, 11 ka buwan.

Nangaangol sila si Pristine, 30, ug iyang bana nga si Gelou Cabornay, 31, ingon man ang ilang anak nga si Zachary, 6 anyos. Ang magtiayon nakaangkon og first-degree burns.

Si Elmer Cabornay, uyoan sa mga biktima nga nahinabi sa Superbalita Cebu, nagkanayon nga nakamata siya sa sipang buto sa liquefied petroleum gas (LPG) tank.

Sa paggawas niya sa lawak, nag-aso na sa ilang sala ug iyang nakita ang iyang maguwang nga si Gelou ug asawa nga si Pristine.

Nagkayo ang mga buhok sa iyang maguwang ug bayaw busa iyang gitabang pagbira paggawas sa ilang balay kay dako na ang kayo.

Ang mga lawas, nawong ug buhok nasunog ug nahibilin ang masuso nga anak sa magtiayon.

Sa kadako na sa kayo, wala na niya ma rescue ang iyang laing tulo ka mga pag-umangkon nga naa sa ikaduhang andana.

“Nakita nako silang tulo naa sa bentana naghilak nangayo’g panabang. Nisinggit intawon sila, kita ko bisan aso kaayo. Luoy kaayo,” dugang ni Elmer nga naghilak samtang nag-asoy sa nahitabo sa iyang mga pagumangkon.

Siya nipasabot nga kon nipugos pa siya sa pagsulod sa balay aron luwason ang mga bata, hayan naapil siya sa pagkasunog.

Sila si Elmer, uban sa iyang pamilya, mga kabanay ug silingan naghinilakay nga nagsud-ong sa nasunog nga balay samtang ang upat ka mga bata naa sa sulod.

Ang inahan sa tulo ka mga bata nga si Christine namaligya og sud-an gawas sa ilang balay.

Ang iyang bana ni-duty sa trabaho hinungdan nga ang mga bata lang ang nahabilin nga nangatulog sa taas sa balay.

“Dili nako kaya, kalit, Nay oy! Kalit kaayo! Sila gyud tulo. Sus, Ginoo ko,” singgit ni Christine nga nagtan-aw sa balay una pa siya nakuyapan.

Ang amahan nga si Melson Bayaton, 30, nagminatay sa paghikak, niyaka sa yuta dihang niabot ug nasayod nga naapil pagkasunog ang ilang tulo ka mga anak.

Wa nay hapit mga pulong nga nigawas sa iyang baba samtang naghukdong, niluom sa paghilak.

DI PA MATINO

Di pa makasulti ang kabomberuhan sa dakbayan sa Sugbo kon unsay hinungdan sa sunog.

Kini maoy gibutyag ni FO3 Fulbert Navarro, imbestigador sa Cebu City Fire Office (CCFO) sa Bureau of Fire Protection (BFP) dihang nahinabi sa Superbalita Cebu sa Huwebes sa hapon.

Sumala pa niini nga tanang mga posibilidad ilang gitan-aw apan usa sa ilang gitan-aw ang kalan sa kusina. Wa nila isalikway ang electrical ug usa ka kaha sa kusina nga hayan nikayo samtang nagluto ang magtiayon.

Ilaha pang balikon karong buntag sa Biyernes ang lugar aron ilang kuhaan og samples ang dapit nga ilang masumiter sa laboratory aron masubay ang gigikanan ug hinungdan sa kayo.

Naglisod sila pagkuha og detalye sa managtiayong Cabornay kay di pa makaestorya kay nasunog ilang nawong ug baba, ubang parte sa lawas.

“Amo balikon sa area kay nahugno man to. Kaykayon namo’g balik kay ang magtiayon lisod paman kuhaan og pamahayag. Daghang paso sa nawong apil ang baba,” pagpasabot ni Navarro.