Nisamot og kalubog ang gihugonhugon nga rematch tali ni Manny Pacquiao ug Yordenis Ugas nga gikatakda sa uwahing bahin ning tuiga.

Kini tugod kay ang World Boxing Association (WBA) nimando sa ilang welterweight champion nga Ugas sa pagdepensa sa iyang titulo batok sa mandatory challenger nga si Eimantas Staniosis sa Lithuania.

Matod pa sa taho, nga aduna na diay resolution nga gipagawas sa niaging adlaw ang WBA.

“Yordenis Ugas must defend the title against the next leading available contender Eimantas Stanionis within 120 days from the date of this resolution. The Super Champion must box the regular champion by the end of March 2022,” mao ni unod sa resolution.

Ang WBA di moila og Pacquiao. Lab-as pa sa panumdoman nga si Pacquiao gitangtangan sa WBA super champion sa niaging tuig human nga wa kini makadepensa sa iyang bakus sulod sa usa ka tuig.

Kini taliwala sa pagsulbong sa Covid-19 niadtong panahona nga mao untay igong irason sa kampo ni Pacquiao.

Wala makarason ang kampo ni Pacquiao sanglit wala sila makadawat og notisya gikan sa WBA may labot sa pagka-inactive sa Pambansang Kamao nga gikasagmuyo og maayo ni Pacquiao.

Nihangyo unta si Pacquiao sa WBA nga ibalik siya isip champion sa dihang si Errol Spence Jr. pa ang iyang orihinal nga makontra sa wa pa kini pulihi ni Ugas.

Apan wala mosugot ang WBA nga gidudahan sa mga analyst nga dili nila type ang Pinoy.

Sa sinugdanan, gusto unta sa WBA nga si Ugas maoy orihinal nga ikontra ni Pacquiao niadtong Agusto 22, apan wa mosugot ang fighting senator kay wala may crowd si Ugas.

Gipili ni Pacquiao si Eroll Spence Jr. nga mao unta ang gikahinaman nga away apan lagi na

injured man si Spence mao nga gihulipan siya ni Ugas.