Kalisod ibiseklita karong panahuna kon mag-exercise ka lang sa Cebu City. Nagtuo ra ba ang mga awtoridad nga suroy suroy o leisure ang pagbiseklita. But actually, ang primary reason sa pagsikad mao ang pag ehersisyo ug ikaduha na lang ang pagsuroy. Mao nay giingon nga naka exercise ka na, nakasuroy ka pa.

Apan naguol ko sa compulsory nga pagpasul-ob og facemask samtang magtungas ang bikers. Ang katarungan kay kon basin mangluwa, anha kuno sa magsunod mopisik ang laway. Naa may mask o wala, kon mangluwa ang biker, mangluwa na. Pila ra may pagtukas sa facemask aron makapangluwa ug ibalik dayon.

Kalisod sa pagginhawa samtang magtungas. Kutas na gani kaayo, sampungan pa ang imong ilong ug baba. Di ra ba lalim. Niadtong nag enhanced comumunity quarantine pa ang Sugbo, nag bike ko samtang nag facemask. Maora ko og malumos kay struggle kaayo ang pagghinhawa. Patag ra gani ko nagsubay, unsa na kaha kon nagtungas ko.

Ang nakapait ra ba tawon sa kinabuhi sa mga biker nga manungas sa Busay kay dunay mag-atang nga mga pulis nga sakop sa Traffic Enforcement Unit (TEU). Manakop na sila sa mga tawo nga wa mag facemask, apil na sa bikers. Ako silang nakit-an sa ganghaan sa Marco Polo nga nagbarog.

SUGYOT LANG

Kon gusto sa mga awtoridad nga ipatuman ang mga health protocol, di maayo nga lisod lisuron ang mga mahilig sa biseklita. Proven na baya sa science nga ang outdoor exercise kuli kaayo nga maoy higayon sa pagtakdanay sa virus. Mao gani nga sa mga nasod sa Europe, ilang gidasig ang pag biseklita. Karon dunay shortage sa biseklita nga molanat hangtod sa hinapos sa 2022.

Namatud-an na sab sa mga eksperto nga ang pag exercise nga grabe kaayo, kuyaw ang resulta. Kuyaw sa atake sa kasingkasing ug uban pa. Kon mag exert kag maayo, mas manginahanglan ka og more oxygen nga makasulod sa imong lawas. Apan pasulubon ka na hinuon og facemask.

Mas maayo pa tingali nga ang kapulisan adto na magbantay sa tapukanan sa mga nagbiseklita kay mas didto dako ang kahigayunan sa panagtapok nga way facemask. Sa Busay, naa na diha sa ilang kanhi Willy Ardiente ug sa may Buak nga sakop na sa laing barangay. Kanang duha ka mga dapit maoy bantayan.