Hinayhinay karon nga nahulma nga posibleng pulos Pinoy ang magsangka sa finals sa 2021 US Open Pool Championship sa Harrah’s Resort, Atlantic City sa Amerika.

Kini human nakasulod sa semifinals silang Dennis Orcollo ug Carlo Biado diin silang duha nahimutang sa lainlaing bracket.

Si Orcollo pabilin nga wa pa makatilaw og kapildihan sa panagtigi pinaagi sa pagpukan ni Mario He sa Austria, 11-6, sa last 16 round ug ingon man ang laing taga Austria nga si Max Lechner, 11-7, sa quarterfinals.

Sa iyang bahin, si Biado nilatas una og malisod nga dalan una pa niya nadispatsar si David Alcaide Bermudez, 11-10 sa round 16 ug dayon gisunod niya sa pagpalagpot ang kaubang Pinoy nga si Johann Chua sa susamang score.

Ikaatbang ni Orcollo mao ang bag-ong sulbong nga Singaporean nga si Aloysius Yapp samtang ikabangga ni Biado si Naoyuki Oi sa Japan.

Ang mga analyst nagkanayon nga mag-abot ang duha ka Pinoy sa finals o usa kanila ang masulod apan kon dimalason, posible usab nga walay makasulod kanila.

Ang mga banggiitang mga Amerikano ug ubang mga ngilngig nga bilyarista sa Europe pulos nangataktak sa sayong bahin sa eliminasyon.

Atol sa pagsuwat niining balita, wala pa mahuman ang duwa sa semifinals nga gibituonan sa upat ka maayong laki sa bilyard sa tibuok kalibotan.

Ang modaog sa duha ka bracket maoy mag-abot sa finals ug ang mahimong kampyon sa maong kompetisyon maoy makabulsa sa $50,000 kun P2.5 milyones.