3 KA POLICE STATIONS SA LAPU GIAYO
Migahin og P3 milyones nga pundo ang 6th District Office sa Department of Public Works and Highways DPWH-7 aron mapanindot ang tulo ka mga police station sa Lapu-Lapu City Police Office (LCPO) sa dakbayan sa Lapu-Lapu.
Nahimo kining posible gumikan sa pagpaningkamot ni Kongresista Paz Radaza.
Ang mga police station naglakip sa Station 2 nga nahimutang sa Brgy Mactan, Station 3 nga nahimutang sa Brgy Gun-ob, ug Station 5 nga nahimutang sa Brgy Pusok.
Matod sa kongresista nga matag police station nakadawat og tag P1 million nga pundo nga ilang gigamit sa pagpa renovate sa ilang buhatan.
Ang tulo ka police stations nahuman na pagpanindot sa ilang mga buhatan, matod ni Radaza.
Alang sa kongresista nga dako og papel ang kapulisan sa pagpabilin sa kahapsay ug kalinaw sa dakbayan hinungdan nga angay sila tagaan og nindot nga buhatan ug tibuok suporta.
Gawas sa tulo ka police stations, plano usab sa kongresista nga mogahin og laing pundo alang sa pagpatukod og multipurpose building sa Station 4 nga nahimutang sa Brgy Marigondon human nga iyang nasuta ang kasamtangang sitwasyon dihang iya kining gibisita.
Sa umaabot adlaw, pormal na usab nga i-turnover sa kongresista ang nagkadaiyang mga proyekto sa DPWH-7 nga iyang gipaningkamotan nga matigayon.
“Kanunay gyud ta nga misuporta kanila sa tanan nilang kalihokan even now nga dia nako sa Congress,” matod ni Radaza.
SUPER BLOWOUT
tl-ph
2021-09-19T07:00:00.0000000Z
2021-09-19T07:00:00.0000000Z
https://epaper.sunstar.com.ph/article/281904481312996
SunStar Publishing Inc.