Ang generation rates sa Visayan Electric franchise areas moubos og 0.07 centavos alang sa September-October billing period.

Ang presidente ug Chief Operating Officer, Raul C. Lucero, niingon nga ang gamay nga pagminos sa generation rates alang sa billing period karon mao ang ubos nga power rates sa Wholesale Electricity Spot Market (WESM).

Gikan sa average rate nga P12.02 matag kilowatt hour alang sa residential customers alang sa August-September billing period, ang average residential rates sa September-October billing period naa na sa P11.95 matag kilowatt hour.

Kon tan-awon, gamay ra kini nga pagkanaug busa kinahanglan gihapon nga magdaginot sa kuryente.

Samtang, ang Visayan Electric nagsugod na sa pagpamutol sa linya sa mga kustomer nga dunay labing minos duha ka mga buwan ang bayranan nga bills niadtong Septiyembre 8 human ang mga siyudad ug lungsod ubos sa iyang franchise area gideklarar nga ubos sa general community quarantine (GCQ).

Ang utility hinuon nagtanyag og payment arrangements sa mga kustomer nga maayo og standing nga di makabayad sa ilang tibuok bills tungod sa kalisdanan dala sa pandemic.

Mga kustomer nga buot mo-apply alang sa payment arrangements mahimong moduaw sa Visayan Electric service centers nga nahimutang sa One Pavilion Mall sa Banawa, JCentre Mall, Piazza Elisea sa Talamban, Glajj Building sa Consolacion o sa South Extension Office sa Tabunok, Talisay City.

Bisan pa niini, ang Visayan Electric kanunay nga nagpahinumdom sa mga konsumidor sa pagdaginot sa kunsumo sa kuryente pinaagi sa maayong paggamit niini.