Namatay ang usa ka taxi driver human naligsan sa usa ka dumptruck sa Sabado sa buntag, Septiyembre 18, 2021, dihang nilabang sa karsada gawas sa merkado publiko sa Tabunok, Dakbayan sa Talisay.

Si Jonathan Tumulak, pangu sa City of Talisay-Traffic Operations and Development (CT-TODA), niila sa biktima nga si Exuperio Catubay, 57, taga Dumlog, Dakbayan sa Talisay samtang ang drayber nga nakaligis mao si Benjie Escorial, 55.

Si Tumulak sa interbyu sa Superbalita Cebu niingon nga si Catubay gikan nga nangompra sa merkado.

Nilabang unta si Catubay sa karsada nga paingon sa Barangay Lagtang, apan nihunong siya sa center line sa karsada.

Matod ni Tumulak nga nag-ukon ukon sa pagtabok si Catubay.

Wa siya makit-i ni Escorial nga nagmaneho sa dumptruck hinungdan nga sa pag-abante, nasabod si Catubay sa kilid sa sakyanan.

Naguroy siya ug natumba dayon napasok sa ilawom sa trak ug naligsan sa panguwahiang mga ligid. Namatay diha-diha si Catubay. Matod ni Tumulak nga ilang gikustodiya si Escorial kay namatay ang biktima.

Naa ra sa banay ni Catubay kon mopadayon ba sila sa pagpasaka og kaso.