Nasikop atol sa entrapment operation sa National Bureau of Investigation (NBI) ang usa ka babaye nga giingong namaligya og overpriced nga tambal batok coronavirus disease 2019 (Covid-19) sa dakbayan sa Sugbo.

Subay sa giluwatan nga pamahayag sa NBI-7 sa Septiyembre 17, 2021 giila ang suspek nga si Cherry Jalaron nga gikatahong nagbaligya og Tocilizumab sa poseur buyer sa NBI sa kantidad nga P97,000 ang usa lang ka vial.

Mas mahal kini kon itandi sa maximum retail price (MRP) nga P20, 581.45 matag vial sa mao nga tambal.

Ang tambal maoy gituohan nga makatabang sa pagpamenos sa mortality rate sa severe cases sa mga Covid-19 patients.

Si Jalaron nasikop niadtong Septiyembre 13 alas 7:15 sa gabii sa Barangay Guadalupe, dakbayan sa Sugbo.

Kon diin personal nga gidunol niya ang usa ka vial sa Tocilizumab ug midawat sa P97,000 nga marked money isip bayad sa tambal.

Ang operasyon giingong nahitabo subay sa hangyo ni Office of the Presidential Assistant for the Visayas (OPAV) Secretary Michael Dino nga susihon ang usa ka babaye nga ginganlan og Karen Go nga illegal nga giingong namaligya sa tambal.

“After surveillance and verification, NBI-CEVRO confirmed the illegal activity,” asoy sa NBI

“According to the arrested subject, she is the secretary of Karen Go and was instructed by the latter to deliver the medicine,” dugang pa niini.

Si Jalaron nakalapas sa Section 24 may labot sa Section 25 ubos sa Republic Act No. 9502 o ang Universally Accessible Cheaper and Quality Medicines Act of 2008.

Sa uwahing pakisusi, naka-bail si Jalaron apan padayon nga gipangita si Go sa mga awtoridad.