Wala pa nipagawas og hukom ang One Cebu kon kinsa ang ilang suportahan sa pagka-presidente sa nasud karong umaabot sa Mayo 2022.

Matod ni Governor Gwendolyn Garcia human sa pagbisita ni Senador Panfilo “Ping” Lacson niadtong Biyernes sa iyang buhatan nga iya kining gipasabot nga sa pagkakaron ang One Cebu nakatutuk sa pagpalig-on sa ilang grupo.

Sigon pa ni Garcia nga modesider sila hangtod karong Nobyembre 15 bisan kon ang filing of certificate of candidacy (COC) karong Oktubre 8 sanglit hangtod Nobyembre 15 man ang substitution.

“Senate President Tito Sotto already here that they are running for the President and Vice President. I think so far, murag mao paman nay klaro. That’s why ang One Cebu has come up with a statement nga we will only focus and that’s what I told them. We are focusing on the strengthening of One Cebu because right now the situation seems to be very very fluid in the national scene. And we will have to decide, we have until November 15 kay even though the deadline for the filing of COC on the 8th of October, but we have until 15th of November for substitution,” matod ni Garcia.

Matod ni Garcia nga si Lacson ug si Senate President Vicente “Tito” Sotto III ang klarung modagan pagka-pangulo sanglit sila pa man ang nibisita sa Probinsya.

Gihulagway usab ni Garcia nga usa ka desenteng tawo si Lacson human siya nakasaksi mismo atol sa iyang pagbisita kaniadtong gobernador pa ang iyang amahan nga si anhing gobernador Pablo Garcia.

Matod ni Garcia nga wala nisuway paghangyo si Lacson nga suportahan sa iyang amahan kay sayod man kini nga suportado ni Pabling si kanhi Presidente Gloria Macapagal Arroyo niadtong 2001.