Duha ang patay sa giingong armed encounter tali sa mga sakop sa PNP Special Operations Unit (SOU) 7 nga gipangulohan ni Police Major Alejandro Batobalonos ug planters atol sa gilusad nila nga ronda sa usa ka marijuana plantation sa sitio Kaloctogan, Barangay Pangamihan, bukirang dapit sa siyudad sa Toledo alas 10 sa Sabado sa buntag, Septiyembre 18, 2021.

Ang nangamatay giila nga sila si Eduardo Cabiles Jr ug ang naila lang sa ngan nga Gilbert.

Matod ni Batobalonos nga nakadawat sila og report labot sa gipangtanom nga marijuana sa dapit hinungdan nga ilang gilusad ang surveillance.

Human masuta nga tinuod ang nadawat nga kasayuran, ila dayong gihimo ang operation uban ang Toledo City Police Station, 2nd Provincial Mobile Force Company ug Philippine Drug Enforcement Agency Regional Office 7. Nagsugod sila og saka sa alas 2 sa Sabado sa kaadlawon.

Ilang naibot ang gibana-bana nga 10,000 ka punoan sa hingkod na nga marijuana nga balor og P2 million nga gitanom sa usa ka ektaryang luna.

Ilang nadakpan ang gitumbok nga nag tanom nga silang Reymark Cabiles, Renante Cama-ongay ug Envaristo Camaongay alias “Jr”.

Apan usa ka Ryan Cabiles ang nakasibat atol sa dinakpanay.

Sa dihang malampuson na ang operation, ila nang gipangsunog ang mga punoan sa marijuana. Human sa ilang inventory, ila nang gipangdala ang mga dinakpan paingun sa Toledo City police station.

Apan sa dihang nagbaktas agi sa panimay nilang Eduardo Cabiles Jr. dala ang mga dinakpan, kalit lang sila nga gipamusil gikan sa sulod sa balay.

Dali usab dayon nga mibawos ang mga operatiba.

Nilanat pa og pila ka minutos una nahunong ang pinusilay ug sa dihang gisusi na nila, duha ka mga tawo ang nag buy-od sulod sa kwarto nga ilang giila nga si Cabiles ug alyas Gilbert.

“Approaching sa balay sa ilang papa nga si Eduardo Cabiles Sr., gi-ambush man hinuon mi. Actually kini sa Eduardo Cabiles Jr mao sad ni ang nagpusil sa pulis nga nag surveillance didto sa ilaha, wala lang mamatay. Ang iya gurong tuyo sa pag-ambush sa amoa nga mabuhian namo tong iyang mga igsuon nga among nadakpan,” matod ni Batobalonos.

Naila matod pa ang pamilyang Cabiles sa Barangay Pangamihan nga mananumay og marijuana. Gani ang ilang amahan nga si Eduardo Sr. nabilanggo na sa Toledo City Police Station tungod sa pagpananom.

Mao na kini ang panginabuhian sa pamilyang Cabiles sa maong dapit.

Nakakuha usab ang mga operatiba og usa ka unit nga Ingram nga adunay un-inserted magazine, usa ka unit sa AR15 with inserted magazine, usa ka .45 caliber pistol, drug paraphernalia, mga pinaugang dahon sa marijuana nga mo balor og P5,000.

Dugang ni Batobalonos nga ang mga dinakpan adunay mga pending warrants of arrest gikan sa korte sa Siyudad sa Danao ug Toledo sa kaso gihapon sa pagpananom og marijuana. /