Nakita ni Isyot nga gilutos ang iyang manok nga dumaga sa manok nga sunoy ni Pistong. Ang dumaga mao na lay nahabilin sa iyang mga manol kay ang uban gipanukob sa mangtas nga maral. Kining maral anaa magpuyo sa kakahuyan ibabaw sa ilang sityo ug modulhog kini panahon sa gabii. Mao bitaw nga nangandam na karon kanunay si Isyot sa iyang sapang. Gibaid niya pag-ayo ang tumoy niini ug puwerte nang haita.

“Isyot, kana bang sunoy nilang Pistong morag may pagka teksas kay nindot man kaayog barog,” ni Magda ngadto sa iyang bana.

“Unsay teksas god? Bisaya kaayo nang dako, uy!” tig-ang tingog ni Isyot, nagpasabot nga duna gihapoy kaligutgot nga nagpabilin diha sulod sa iyang dughan. Ang iyang hiniktan nga igtatari gipaak sa iro ni Pistong ug gipaak-paak pa gyud ang lawas ug isol. Ug karon nagluya na kini. Mao nga naglagot kaayo siya kang Pistong.

Si Isyot may anak nga dalaga. Guwapa kini ug daghan nahimo ganing ‘Muse’ sa liga sa basketbol matag pangolin sa ilang patron dinhi sa ilang baryo. Ug ang nakapaulbo sa kaspa ni Isyot mao ang kasayuran nga uyab kini sa anak nga ulitawo sa magtiayong Pistong-Julia. Kagabii mibukal ang dugo ni Isyot kay lawom nang gabii dihang nahiuli sa balay si Elena nga gihatod ni Dario, anak ni Pistong.

Paghilabay sat ulo ka adlaw nahipugwat si Isyot sa siyagit ni Magda usa ka sayong buntag.

“Isyot! Isyot! Wala na si Elena sa iyang kuwarto! Hasta ang iyang maleta ug mga sinina!” mitaliis ang ingog ni Magda.

Midali pagsulod si Isyot sa kuwarto ni Elena ug nakita niya ang usa ka sulat nga gipatong sa lamesita. Iyang gipunit ug gibasa: “Tay, pasayloa ko. Mikuyog kong Dario kay sabot namo nga magtaban. Gihigugma ko siya, Tay. Ingna si Nanay Magda nga way mahitabo nako nga dautan kay gihigugma ug gipangga sab ko ni Dario. Imong anak, Elena.” Misamot pag-ulbo ang kaspa ug misamot pagsurok ang iyang dugo kay kaong semestreha mo-gradwar na man si Elena sa kursong BSE kay gusto mahimong maestra.

Gikumot ni Isyot ang sulat ug nanambo sa bentana. Didto sa tugkaran nakita niya ang sunoy ni Pistong nga mibirig pag-ayo sa iyang dumaga, Mikagot pag-ayo ang iyang mga ngipon dihang iyang nakita nga giupahan sa sunoy ang iyang dumaga. (KATAPUSAN)