For the first time sa akong kinabuhi mikuyog kog lalaki sa pagpanan-aw og sine. Well, boyfriend ko man sab ang akong gikuyogan. Nagsige siyag pisil sa akong kamot. Ngitngit ang sulod sa sinehan. Bugnaw ang aircon sa balcony nga among nahimutangan.

Nakagakos ko kang Barnie. Di na hinuon bag-o nako ang paggakos sa akong boyfrein. Kon manuroy mi sa mga parks sa siyudad, magginaksanay man mi usahay.

Gipislit ni Barnie ang akong aping. “I love you, Jinky.”

Gipislit ko sab ang aping sa akong boyfriend.

“Di ko motuo nimo, Barns. Kon tinuod pa kanang imong giingon nganong wa man nimo sunda ang akong gitambag nimo?”

Nahilom si Barnie. Nagkadungan mig gradwet sa hayiskol sa among lugar sa Mambaling apan wa na mopadayog eskuwerla sa college si Barnie. Gisugot ko siya dihang fourth year high school pa mi. Ug karon second year college na ko.

“Samok ang akong hunahuna, Jinky. Sila si Mama ug Papa nagbuwag ug

duna nay laing pamilya. Gitug-an ko na kini nimo.”

“Pero ang imo mang kaugmaon ang akong gihunahuna?”

“Sige. Buhaton ko ang imong gusto para nimo, Jinky. Gikapoyan na sab ko sa pag-estambay. Andam man sab mogasto sila si Mama ug Papa nako sa college. Naghuwat lang sila sa akong pag-ingon nila.” “Naa ra man diay na, Barnie. Karon, motuo na ko nga love gyud ko nimo.”

Nakalitan ko kay kalit nga gihagkan ni Barnie ang akong mga ngabil. Unang higayon pa karon nga nahagkan og lalaki ang akong lips. Kalit nakong gitukmod ang akong boyfriend.

“Naunsa ka man, Barnie, nga mangalit man lang ka sa paghawok nako?”

Gipahiran ko sa akong palad ang akong mga ngabil. Nabasa man gud kini sa laway sa akong boyfriend. Apan inay motubag si Barnie, gihagkan na sab niya ang akong mga ngabil. Ning higayona wa na ko makahimo pagtukmod niya kay hugot man ang iyang paggakos nako.

Unya namatngonan ko na lang ang kamot ni Barnie nga miwalis sa sidsid sa gisul-ob kong sayal.

(SUMPAYAN)